Don't Miss
Home / BUSINESS / നോട്ട് നിരോധനം കനത്ത സാമ്പത്തിക ആഘാതം സൃഷ്ടിച്ചെന്ന് മുന്‍ മുഖ്യ സാമ്പത്തിക ഉപദേഷ്ടാവ് അരവിന്ദ് സുബ്രഹ്മണ്യന്‍

നോട്ട് നിരോധനം കനത്ത സാമ്പത്തിക ആഘാതം സൃഷ്ടിച്ചെന്ന് മുന്‍ മുഖ്യ സാമ്പത്തിക ഉപദേഷ്ടാവ് അരവിന്ദ് സുബ്രഹ്മണ്യന്‍

ന്യൂഡല്‍ഹി: നോട്ട് നിരോധനം കനത്ത ആഘാതമാണു സമ്പദ് വ്യവസ്ഥയില്‍ ഉണ്ടാക്കിയതെന്നു പ്രധാനമന്ത്രിയുടെ മുന്‍ മുഖ്യ സാമ്പത്തിക ഉപദേഷ്ടാവ് അരവിന്ദ് സുബ്രഹ്മണ്യന്‍. നോട്ട് നിരോധനത്തിനു മുന്‍പത്തെ ആറു സാമ്പത്തികപാദങ്ങളിലെ വളര്‍ച്ചാ നിരക്ക് ശരാശരി എട്ട് ശതമാനമായിരുന്നു. എന്നാല്‍ നിരോധനത്തിനു ശേഷമുള്ള ഏഴു സാമ്പത്തികപാദങ്ങളില്‍ ഇത് 6.8 ശതമാനം മാത്രമാണെന്നും അരവിന്ദ് സുബ്രഹ്മണ്യം വിശദീകരിക്കുന്നു.
നാല് വര്‍ഷം ഉപദേശക സ്ഥാനത്തു തുടര്‍ന്ന അരവിന്ദ് സുബ്രഹ്മണ്യം ഈ വര്‍ഷം ആദ്യമാണു ചുമതല ഒഴിഞ്ഞത്. പുറത്തിറങ്ങാനിരിക്കുന്ന അദ്ദേഹത്തിന്റെ പുസ്തകമായ ‘ഓഫ് കൗണ്‍സല്‍, ദി ചാലഞ്ചസ് ഓഫ് ദ് മോഡി ജയ്റ്റ്ലി ഇക്കണോമി’ യിലാണ് ഇതു സംബന്ധിച്ചു പരാമര്‍ശം.
നോട്ട് നിരോധനത്തില്‍ തീരുമാനമെടുക്കുന്നതിനു മുന്‍പു പ്രധാനമന്ത്രി തന്നോട് ഉപദേശം ചോദിച്ചിരുന്നോ എന്ന കാര്യത്തില്‍ അദ്ദേഹം പ്രതികരിച്ചിട്ടില്ല. നിര്‍ണായക തീരുമാനം കൈക്കൊള്ളുന്നതിനു മുന്‍പ് പ്രധാനമന്ത്രി ഉപദേഷ്ടാവിനോട് അഭിപ്രായം ചോദിച്ചിട്ടില്ലെന്നു നേരത്തേ വിമര്‍ശനമുയര്‍ന്നിരുന്നു.
നോട്ട് നിരോധനത്തോടെ 86 ശതമാനം കറന്‍സികളും തിരികെയെത്തി. ജിഡിപി വളര്‍ച്ചയെ ഇതു മോശമായി ബാധിച്ചു. നോട്ട് നിരോധനത്തിനു മുന്‍പു തന്നെ വളര്‍ച്ച പതുക്കെയായിരുന്നു. എന്നാല്‍ പിന്നീട് ഇടര്‍ച്ചയുടെ വേഗത കൂടി. ഇക്കാര്യത്തില്‍ ആര്‍ക്കും തര്‍ക്കമുണ്ടാകും എന്നു തോന്നുന്നില്ല. ഇതേസമയത്തു തന്നെ പലിശ നിരക്ക്, ജിഎസ്ടി, ഇന്ധനവിലയിലെ മാറ്റം തുടങ്ങിയവയെല്ലാം വളര്‍ച്ചയെ ബാധിച്ചു. അദ്ദേഹം പറഞ്ഞു.
അടുത്ത കാലത്തൊന്നും ഒരു രാജ്യവും കൊണ്ടുവരാത്ത നീക്കമാണു നോട്ട് നിരോധനം. കാലമെടുത്തുള്ള നോട്ട് നിരോധനം, പെട്ടെന്നുള്ള നിരോധനം തുടങ്ങിയ രണ്ടു രീതികളാണ് ഉള്ളത്. യുദ്ധം, സാമ്പത്തിക മാന്ദ്യം, രാഷ്ട്രീയ കലാപം തുടങ്ങിയ സാഹചര്യങ്ങളിലാണ് പെട്ടെന്നുള്ള നിരോധനം കൊണ്ടുവരുന്നത്. ആധുനിക ഇന്ത്യയുടെ ചരിത്രത്തിലെ ഇതുവരെയില്ലാത്ത രീതിയിലുള്ള പരീക്ഷണമായിരുന്നു നോട്ട് നിരോധനമെന്നും അദ്ദേഹം വ്യക്തമാക്കി.