Don't Miss
Home / COVER STORY / സൗമ്യയ്ക്ക് വിട.. മാവേലിക്കരയില്‍ കൊല ചെയ്യപ്പെട്ട പൊലീസുകാരി സൗമ്യാ പുഷ്പാകരന്റെ മൃതദേഹം സംസ്‌ക്കരിച്ചു.

സൗമ്യയ്ക്ക് വിട.. മാവേലിക്കരയില്‍ കൊല ചെയ്യപ്പെട്ട പൊലീസുകാരി സൗമ്യാ പുഷ്പാകരന്റെ മൃതദേഹം സംസ്‌ക്കരിച്ചു.

ആലപ്പുഴ: വിവാഹ അഭ്യര്‍ഥന നിരസിച്ചതിന് സഹപ്രവര്‍ത്തകന്‍ തീവച്ചു കൊലപ്പെടുത്തിയ പോലീസ് ഉദ്യോഗസ്ഥ സൗമ്യ പുഷ്‍കരന്‍റെ സംസ്‍കാരം കഴിഞ്ഞു. രാവിലെ 11 മണിക്കായിരുന്നു സംസ്‍കാരച്ചടങ്ങുകള്‍. രാവിലെ ഒമ്പത് മണി മുതല്‍ മൃതദേഹം സൗമ്യ ജോലി ചെയ്‍തിരുന്ന വള്ളിക്കുന്നം പോലീസ് സ്റ്റേഷനില്‍ പൊതുദര്‍ശനത്തിന് വെച്ചു. നേരത്തെ തന്നെ സൗമ്യയുടെ മൃതദേഹം ബന്ധുക്കള്‍ക്ക് വിട്ടുനല്‍കിയിരുന്നു. സൗമ്യയുടെ ഭര്‍ത്താവ് ലിബിയയില്‍ നിന്ന് തിരിച്ചെത്താന്‍ കാത്തിരിക്കുകയായിരുന്നു ബന്ധുക്കള്‍.

പ്രതി അജാസ് ഇന്നലെ ചികിത്സയിലിരിക്കെ മരണപ്പെട്ടിരുന്നു. ദേഹത്ത് ഗുരുതരമായി പൊള്ളലേറ്റ ഇയാള്‍ ഇന്നലെ വൈകീട്ടോടെ മരിച്ചു. ജൂണ്‍ 15നാണ് സിപിഒ സൗമ്യയെ ക്രൂരമായി സുഹൃത്ത് അജാസ് കൊലപ്പെടുത്തിയത്. വീടിന് മുന്നില്‍വച്ച് സൗമ്യയെ കാർ കൊണ്ട് ഇടിച്ചു വീഴ്ത്തിയ ശേഷം കൊടുവാള്‍ കൊണ്ട് വെട്ടി, പെട്രോൾ ഒഴിച്ച് തീ കൊളുത്തി കൊല്ലുകയായിരുന്നു. സൗമ്യ വീട്ടിൽ നിന്നും സ്‌കൂട്ടറിൽ റോഡിലേക്ക് ഇറങ്ങിയ ഉടനെ ആയിരുന്നു ആക്രമണം. സംഭവസ്ഥലത്ത് വച്ച് തന്നെ പോലീസുകാരി മരിച്ചു.

എറണാകുളം സ്വദേശിയായ അജാസും കൊല്ലപ്പെട്ട സൗമ്യയും തമ്മില്‍ അഞ്ച് വര്‍ഷത്തോളം സൗഹൃദമുണ്ടെന്നാണ് മൊഴി. ഇയാളില്‍ നിന്ന് ഒന്നരലക്ഷം രൂപ സൗന്യം കടംവാങ്ങി. ഇത് തിരികെ കൊടുത്തെങ്കിലും അജാസ് വാങ്ങിയില്ല, സൗമ്യ തന്നെ വിവാഹം കഴിക്കണം എന്നായിരുന്നു ആവശ്യം.

ഇത് നിരസിച്ചതിന്‍റെ പകയാണ് അജാസിനെ കൊലപാതകത്തിലേക്ക് എത്തിച്ചത്. അതിക്രമത്തിന് ശേഷം അജാസിനെ കേരള പോലീസ് സസ്‍പെന്‍ഡ്‍ ചെയ്‍തിരുന്നു. മൂന്നു മക്കള്‍ക്കും അമ്മയ്‍ക്കും ഒപ്പമാണ് സൗമ്യ കഴിഞ്ഞിരുന്നത്. അജാസിന്‍റെ ഭീഷണിയെക്കുറിച്ച് സൗമ്യയുടെ മൂത്തമകനും അമ്മയും മൊഴി നല്‍കിയിട്ടുണ്ടായിരുന്നു.